Kasper Schmeichel leggur handskarnar á hillina

- Tá mín sáttmáli við Celtic gongur út í juni, gevist eg sum fótbóltsspælari. Tað er ein avgerð, sum er tikin fyri meg. Eg havi verið í samráði við fleiri skurðlæknar og serfrøðingar, í mun til mína øksl. Teir hava sagt, at eg ikki skal vænta at spæla fleiri dystir á hægsta stigi. Eg havi gjørt mær nógvar tankar um hetta og meti, at hetta er rætta løtan.

Soleiðis sigur Kasper Schmeichel í samrøðu við danska TV2 í morgun. Hon varð gjørd í Parkini, har málverjin hevur spælt mangar landsdystir. Schmeichel yngri hevur spælt 120 ferðir fyri danska manslandsliðið. Bert pápin, Peter, Denis Rommedahl, Simon Kjær og Christian Eriksen hava spælt fleiri.

- Tað hevur altíð verið ein heiður og tað størsta at spæla fyri Danmark, sigur Schmeichel, sum javnan hevur borið liðskiparabandið.

Danskir viðmerkjarar eru so at siga á einum máli um, at hetta er ein av teirra størstu, sum nú steðgar.

Kasper Schmeichel eftir danska fjórðingsfinalusigurin undir EM-endaspælinum í 2021. Hálvfinalan á Wembley fyri skjótt fimm árum síðani, var størsti dysturin  Schmeichel spældi á landsliðnum (Mynd: EPA)

Kasper Schmeichel spældi í fýra endaspølum fyri Danmark. Í 2018 bjargaði hann brotssparki hjá Luka Modric í longdu leiktíðini HM-áttandapartsfinaluni móti Kroatia, men tað var ikki nóg mikið

. Tað var tað heldur ikki í longdu leiktíðini í EM-hálvfinaluni trý ár seinni á Wembley, tá Harry Kane skeyt. Ongland skoraði uppá returbóltin og kom í finaluna.

Royndi málverjin var ikki við í Kekkia, tá Danmark tapti HM-røkstøkkdystin í mars. Hetta vegna skaðan í økslini - sum nú eisini er orsøkin til, at heldur serstaki málverjin gevst.

Seinastu árini hevur Kasper Schmeichel spælt í Belgia, Fraklandi og Skotlandi. Annars hevur yrkisleiðin mest verið á bretsku oyggjunum, har stórur partur av uppvøkstri hansara var.

Mest kendur er Kasper Schmeichel fyri at vera tryggur aftasti skansi hjá Leicester í uppflyting til Premier League,varðveitslu av plássinum og sjálvandi ótrúliga meistaraheitinum í 2015/2016.

Schmeichel vann eisini FA Cup við Leicester í 2021. Tá helt danin málið reint móti Manchester City í søguliga steypasigrinum. Hann spældi 479 dystir fyri felagið.

Schmeicel móti Føroyum - í myndum

Í 2020 spældu Føroyar og Danmark venjingardyst í Herning og í 2021 tveir minniligar HM-undankappingardystir. Í níggjunda undandystinum vórðu Føroyar fyrsta liðið, sum skoraði móti Danmark og Schmeichel. Hetta dámdi honum illa.

Patrik Johannesen roynir at leggja trýst á Kasper Schmeichel í Herning. Danmark var á odda 4-0 áðrenn steðgin í hesum venjingardystinum - sum eisini endaði 4-0 (Mynd: Sverri Egholm)

Á fullsetta Tórsvølli 4. september 2021 høvdu Schmeichel og hansara menn størri trupulleikar av Føroyum, enn tey flestu høvdu væntað áðrenn. Útiliðið skoraði avgerandi málið, tá fimm minuttir restaðu í: Áðrenn og aftaná skaptu føroyingar støður og raktu eisini tvørtræðið (Mynd: Jens Kr. Vang)

Ein lættur Schmeichel heilsar uppá starvsfelagan Teit Gestsson eftir síðsta bríksl. Teitur stóð væl hetta kvøldið, og royndi danin átti fleiri rósandi orð til hann og mótstøðuliðið (Mynd: Jens Kr. Vang)

Í november 2021 var Schmeichel ikki so fegin um føroyingar: Ávaringarnir høvdu verið har og seint í undandystinum í Parkini stútaði Klæmint Andrasson Olsen bóltin í danska málið: Eingin annar, undan rituvíkinginum, hevði rakt donsku meskarnar í hesum bólkinum. Frøin á føroyingunum var øðilig hesa løtuna - Danmark økti tó til 3-1 stutt aftaná. Men eins og pápin, lat Kasper mál inn móti Føroyum í Keypmannahavn (Mynd: Sverri Egholm)