KÍ trý stig nærri NSÍ

Eftir at NSÍ vann 3-1 á AB í gjár, svaraði KÍ aftur í spenanndi meistarastríðnum. Eftir nakrar tungar dystir fekk liðið hjá Magnusi Powell góða uppliving við Djúpumýru.

Daniel Johansen, sum spældi við EB/Streymi fyrstu mongu árini av á sínari fótbóltsleið, legði KÍ á odda eftir 18 minuttir og gott spæl.

Tað gjørdist tó ikki nakar gongutúrur hjá KÍ. Serliga móti endanum av 1. hálvleiki og í løtum í 2. hálvleiki skapti EB/Streymur góðar støður og nakrar møguleikar.

Men Mark Jensen var í nøkrum førum væl fyri, millum annað eftir stóran møguleika hjá Hans Paula á Bø og gott EB/Streyma-álop í 65. minutti. KÍ stóð ímóti - og var effektivt.

Eftir eitt trýst og nøkur hornaspark økti innskifti Páll Andrasson Klettskarð. Talan va rum heldur margháttiligt mál, tí Daniel Johansen hevði skotið beint upp í vindin. Tað sá út til at bólturin fór væl uppum, men hann steðgaði nærvið við at fara frameftir, datt niður á tvørtræðið/fingrarnar hjá Jóannes Davidsen, og so var 9'arin hjá KÍ til reiðar.

Tað varð eisini 3-0, hóast útiliðið aftur hótti ímillum. Andras Olsen gjørdi heldur klossut brotspark móti Páll Klettskarð, og Árni Frederiksberg var ísakaldur.

Aftur trý stig á muni millum NSÍ og KÍ - og verandi føroyameistarar hava betri málúrttøku. Leygardagin spælir KÍ steypafinalu móti Víkingi. Landskappingin verður tikin uppaftur um ellivu dagar.